Cod Ymddygiad

Mae Partneriaeth Natur Leol Ceredigion (y Bartneriaeth) yn seiliedig ar themâu amrywiaeth, cynwysoldeb, cydraddoldeb, cynaliadwyedd a hygyrchedd, ac mae’n dod â chyfranogwyr o wahanol gefndiroedd ynghyd o bob rhan o Geredigion a Chymru. Rydym yn gwneud ein gorau glas i sicrhau bod y Bartneriaeth yn ofod proffesiynol diogel a chroesawgar i bob aelod. I sicrhau bod hyn yn digwydd, rydym yn disgwyl i bob aelod ymlynu wrth y cod ymddygiad hwn bob amser pan fydd yn rhyngweithio â’r Bartneriaeth ac ar bob llwyfan y gellir ei gyrchu fel rhan o’r Bartneriaeth (fel gwefannau, cyfryngau cymdeithasol ac unrhyw lwyfan arall).

Ymddygiad disgwyliedig

Mae pob aelod i gael ei drin mewn ffordd ystyriol a chyda pharch, gan roi gwerth ar amrywiaeth y safbwyntiau a’r syniadau y mae’n eu cyfrannu at lwyddiant y Bartneriaeth.
Dylai aelodau’r Bartneriaeth hefyd drin staff y Bartneriaeth yn yr un ffordd ystyriol a ddisgrifir uchod.
Dylai unrhyw feirniadaeth fod yn adeiladol ac yn seiliedig ar syniadau, ac nid yn ymosodiadau personol ar unigolion. Nid yw archwiliad beirniadol o syniadau a chasgliadau, ynddo’i hun, yn gyfystyr ag ymddygiad gelyniaethus nac aflonyddu. Dylai trafodaethau fod mor agored a chynhwysol â phosibl, a dylai’r aelodau fod yn ymwybodol o’r argraff y gall eraill ei chael o’r iaith neu’r delweddau a ddefnyddir ganddynt. Rhaid i bawb ymdrechu i ddeall y naill safbwynt a’r llall, h.y. dylid mynegi beirniadaeth mewn ffordd barchus a’i chyfeirio at syniadau penodol, a dylid derbyn y feirniadaeth honno yn ysbryd trafod syniadau posibl, yn hytrach na’i chymryd yn bersonol, oni bai iddi gael ei mynegi yn y ffordd honno.
Yn ychwanegol at y cod ymddygiad hwn, disgwylir hefyd i’r aelodau ymlynu wrth ganllawiau a thelerau ac amodau llwyfannau eraill (Facebook, YouTube, ac ati) y gallent eu cyrchu drwy’r Bartneriaeth.
Disgwylir i’r aelodau fod yn ystyriol o’r gofod rhithiol o’u hamgylch ac o’u cyd-gyfranogwyr yn ystod cyfarfodydd. Os bydd aelodau’n profi ymddygiad annerbyniol neu amhriodol, neu’n sylwi ar ymddygiad o’r fath, y gellir ei ddehongli fel ymddygiad sy’n torri un neu ragor o ofynion y cod ymddygiad hwn (gweler yr adran am ymddygiad annerbyniol), dylai’r aelodau geisio dogfennu’r ymddygiad hwnnw â thystiolaeth (e.e. cipluniau o negeseuon ar Facebook ac ati) i’w chyflwyno i staff y Bartneriaeth er mwyn iddynt gymryd camau pellach. Dylai aelodau roi gwybod i aelod o staff y Bartneriaeth cyn gynted â phosibl (gweler yr adran am roi gwybod am achosion o dorri gofynion y cod ymddygiad). Nid yw’n ofynnol i’r sawl sy’n rhoi gwybod am achos o’r fath drafod y pryder â’r troseddwr honedig, ac nid oes disgwyl iddo wneud hynny.

Ymddygiad annerbyniol

I sicrhau bod yr aelodau’n gwybod am ymddygiadau yr ystyrir eu bod yn annerbyniol, rhestrir ymddygiadau o’r fath isod, ond nid yw’r rhestr hon yn gyflawn:

Aflonyddu, bwlio, microymosodedd, bygylu ac ensyniadau sy’n greulon (e.e. ymddygiad diraddiol, neu iaith lafar, fel sarhad personol neu iaith rywiaethol, hiliol, homoffobig, trawsffobig, oedraniaethol neu ableddol).
Pob sylw (geiriol ac ar lafar) sy’n ymwneud â rhywedd, cyfeiriadedd rhywiol, anabledd, ymddangosiad corfforol, maint corff, hil, crefydd, cenedligrwydd.
Pob sylw (geiriol ac ar lafar) sy’n atgyfnerthu strwythurau cymdeithasol dominyddiaeth sy’n ymwneud â rhywedd, hunaniaeth a mynegiant rhywedd, cyfeiriadedd rhywiol, anabledd, ymddangosiad corfforol, maint corff, hil, oedran, crefydd.
Defnydd amhriodol o noethni a/neu ddelweddau rhywiol ar lwyfannau ac mewn gofodau rhwydweithio a ddarperir gan y Bartneriaeth.
Bygwth neu stelcio.
Dadlau o blaid unrhyw un neu ragor o’r ymddygiadau uchod, neu annog ymddygiadau o’r fath.

Ymddygiad annerbyniol sy’n ymwneud yn benodol â llwyfannau ar-lein/gofodau rhwydweithio

Sbamio drwy anfon llawer o negeseuon y naill ar ôl y llall. Gall hyn hefyd gynnwys defnydd amhriodol o wepluniau neu GIFiau.
Hysbysebion ymwthgar: ni ddylai negeseuon a phostiadau ond cynnwys deunydd sy’n berthnasol i’r Bartneriaeth ac sydd o werth gwirioneddol i aelodau eraill.
Enwau a lluniau proffil ffug neu amhroffesiynol ar unrhyw lwyfannau ar-lein ac mewn unrhyw ofodau rhwydweithio sy’n ymwneud â’r Bartneriaeth.
Rhannu gwybodaeth bersonol eraill heb eu caniatâd.
Rhannu cynnwys anghyfreithlon neu ddynwaredol, yn enwedig deunydd o dan hawlfraint neu feddalwedd wedi’i dwyn. Mae hyn hefyd yn cynnwys rhannu offer neu wasanaethau anawdurdodedig, rhannu feirysau, maleiswedd neu feddalwedd faleisus.
Rhannu gwybodaeth ffug neu gamarweiniol: dylid sicrhau bod ffeithiau’n cael eu cadarnhau ac mai dim ond gwybodaeth o ffynonellau dibynadwy a rennir. Gall lledaenu gwybodaeth ffug neu gamarweiniol fod yn niweidiol, ac mae’n tanseilio ymddiriedaeth ac uniondeb y gymuned.
Dynwared defnyddwyr, unigolion neu sefydliadau eraill, yn enwedig defnyddio enwau defnyddwyr, lluniau neu enwau arddangos penodol.
Mynd ati’n fwriadol i darfu ar sgyrsiau neu i greu amgylchedd anghyfeillgar, drwy drolio, fflamio neu ddadlau’n ormodol.
Osgoi gwaharddiadau neu fudyddion drwy greu cyfrifon amgen neu ddefnyddio dulliau eraill o’u hosgoi.

Os bydd unrhyw gŵyn yn dod i law staff y Bartneriaeth ynghylch ymddygiad aelod o’r Bartneriaeth nad yw’n dod o fewn y ddwy restr hyn, mae staff y Bartneriaeth yn cadw’r hawl, yn ôl eu disgresiwn, i drin cwynion o’r fath yr un mor llym â’r ymddygiadau a geir yn y rhestrau hyn.

Rhoi gwybod am achosion o dorri gofynion y cod ymddygiad

Gallwch roi gwybod am achosion o dorri gofynion y cod ymddygiad drwy anfon e-bost i’n blwch e-bost swyddogol: biodiversity@ceredigion.gov.uk. Pan fyddwch yn gwneud hyn, gwnewch yn siŵr eich bod yn rhoi testun priodol yn llinell pwnc yr e-bost (e.e. Torri Cod Ymddygiad Partneriaeth Natur Ceredigion) i sicrhau bod modd inni gael hyd i’r e-bost ac ymateb iddo cyn gynted â phosibl.

Canlyniadau

Bydd staff y Bartneriaeth yn ymdrin â phob sefyllfa y mae un neu ragor o ofynion y cod ymddygiad yn cael eu torri ynddi (pa un a yw’n cael ei nodi gan staff y Bartneriaeth neu’n dod i’w sylw drwy law aelod, a pha un a yw’n ymwneud ag aelodau’r Bartneriaeth neu aelod arall o staff y Bartneriaeth) fel a ganlyn:

Byddwn yn ymdrin â phob cwyn yn ddifrifol a byddwn yn ymchwilio iddi yn brydlon.
Bydd staff y Bartneriaeth yn gofyn i unrhyw un sy’n ymddwyn mewn ffordd annerbyniol roi’r gorau i’r ymddygiad hwnnw. Bydd disgwyl i unrhyw un y gofynnir iddo wneud hynny gydymffurfio ar unwaith.
Mae’r Bartneriaeth yn cadw’r hawl i wahardd aelod o unrhyw un neu ragor o ddigwyddiadau’r Bartneriaeth, yn awr ac yn y dyfodol, o ganlyniad i’w weithredoedd. Bydd difrifoldeb a hyd y gwaharddiad hwn yn dibynnu ar yr amgylchiadau o dan sylw.
Byddwn yn cynnal cyfrinachedd i’r graddau y caniateir hynny, ar yr amod nad yw’n niweidio hawliau pobl eraill. I gynnal diogelwch a chyfrinachedd yr achwynydd/dioddefwr yn y gŵyn, ni fydd dim camau penodol a fydd yn datgelu pwy yw’r unigolion hyn yn cael eu cymryd heb ymgynghori â’r achwynydd/dioddefwr na heb eu cymeradwyaeth.

Rydym yn gobeithio y bydd y cod ymddygiad hwn yn sicrhau y bydd eich profiad o ymwneud â Phartneriaeth Natur Ceredigion yn ddiogel ac yn hwyl. Byddwn bob amser yn croesawu awgrymiadau ac adborth, ac os oes gennych unrhyw sylwadau i wella’r ddogfen hon, mae croeso ichi eu hanfon atom drwy e-bost: biodiversity@ceredigion.gov.uk.